1Ti 6 | ASO | STEP | Evene' malitesi nene O'moso'mi gulive di'mi limi apize lengemaa' noune' monote nesi nene divi ledivi' ikelizaze. Evene' malite gelekele' gono gihi-ngidikevo engi' gonou' inite'ine ne'mine lili' i minave muki' ingine a'mine gelekele' gono gihi-ngidaa' avemu' nene gilunivo diziivo' minilizado' o neive li gili gelekele' lamine' i-ngidivo' minilisave.

1 Timothy 6

Gelekele' Gono Daa' Ave Ingine Gizebo Ve'ine Igi Mili I-ngidilizani' Monovomu' Paulo' Timoteo'ni Lo-dine' Gamazi

1 Evene' malitesi nene O'moso'mi gulive di'mi limi apize lengemaa' noune' monote nesi nene divi ledivi' ikelizaze. Evene' malite gelekele' gono gihi-ngidikevo engi' gonou' inite'ine ne'mine lili' i minave muki' ingine a'mine gelekele' gono gihi-ngidaa' avemu' nene gilunivo diziivo' minilizado' o neive li gili gelekele' lamine' i-ngidivo' minilisave. 2 Ido' ve ma gono gihi-ngidaa' ave gizebo ve'ine nene gili ele'vole' ave nilizani' nene engito' gono daa' ave nete nene a'mine gizebo vete nene Izesu' evenele leze zuho neive li gilisa engikumu' gilavo lemavosa gonou' nene alaha' alaha' igi dikelizave. Asi leli' gono dunidi'mo hize ele' o-ngidive nene Izesu' evenele leli' zuho lute ngimunive nene nizave lisa gono engito' dalizani' nene gohi ma amuzo milisa di mini gelekele' lamine' gehepeve i-ngidilizave.

Ato' Mono' Apizi nGimaa' Aveti Monovomukisi Ido' Monototi' Heneni Ve Lili' Ilisa Gilaveti Monovomukisi Timoteo'ni Lo-imine' Gamazi

Mene noluvoni' gamazi nene e'metilizave lo ga'ine do apize ngemezo. 3 Evene' malite mono' gihile lamine' Guvetesi ve Izesu' Kilisito' gamazi mono' monovo lisiheto' lele'mize molaa' neido' nene lu'ine milami gamazi ato' apizi ngimilizani' nene 4 engi' oko'ine di dizi otohato ve none li gilaa' naha inite' hamokumukisi ma gili lamine' amavete nene laa' nave. Mono' monovomu' nene gamazidunu' ge hulo ne hulo laakumu' nene naba goloso ngisaa' neine'za ne'mine oga' ne'mo nene inite' ne'mino do soto' oga' neive: Mumuzo' ogo goloso gelaa' lovo lolize oga' ido' dovo ledevo' gamazi laa' hazamu' ngemenga laa' ga'ine gilaa' 5 eze elemivo eze elemivo laa' ne'mine monovo nene do soto' neive. A'mine ne'mine monovo ne'mini di soto' iga' ave neti madu'ine nene goloso ogavo mini gamazi gihile nene damavo engita nomivo mini inite' gohi gohi dalone' aka nene mono' monovolo' e'metaa' nehe li gilaa' nave. 6 Ido' lamine' inite' gohi gohi dalone' aka nene neine'za ingine giladi'mine ogo me misubou' inite' nevoba asi laza do none' inite' nene leli' votigilelo' mo vo do neive lo hongu lo lamino minosa mono' monovolo' e'metaa' noune' ne'mo luteli'mi heneni nene vai' goloso do soto' o-ledaa' neive. 7 Ne'mine noluvoni' nene nanitekumu' ve. Laza izetehi mulunouti' soto' uningu' nene inite' hamokisi do amosa me misubo hulo volonidaa nene inite' hamokisi ma do vamolosune. 8 Nemu' nene noso' nitekisi okodelo' nitekisi do minelone' nene leli' votigilelo' mo vo do neive lo hongu lo lamino minelone. 9 Ne neiha ingine heneni ve lolo' olone li gilaa' ave nene Satani'mo ngemengu' molo ngimimise' ogavo negi hizi do goloso o-ngedaa' neine' inite' mukikumu' nene ma dunivo li gilaa' nani' ne'mo nene vi Satani'mi gelevusou' bilaa' nave. Ee, evene' di goloso i-ngidi ngele'mize tolovo iga' nani' initekumu' nene ngumo helavo monokuti' limi ingi goloso iga' nave. 10 Ne'mine noluvoni' nene lute monilo' molaa' ne'mo nene ne'mine mana'mine monovo goloso nene do soto' oga' neive. Evene' ma nene moni heneni dalisa gili mono' akaloti' vi gopo igi engi' oko'nido' nene mulumo geni inite' vai' angise'ine di gihaa' nanako nemu' nene noluve.

Timoteo'ni O'moso'mo Imine' Gono Nene Amuzo Molo Do Mineline' Monovomukisi Ido' Heneni Vete Igi Mili Ilizani' Monovomukisi Paulo' Gala Do Lo-imine' Gamazi

11 Ne'mine iga' nani'za O'moso'mi gonolo' ve gaza me luvoni' monovo golosoloti' nene golise ogo mehenga emo mene lo-gemeloni' monovo nene imiselo dalosa amuzo molozo. Ado' monovo lisihekovo' ogakisi mono' monovolo' e'metaakisi Guvelesi vemu' gele ele'vole' ogakisi lute ngemaa' monovo nesi ido' geni inite' soto' ilingu' zege' zege' ogakisi hongu monovo evene' ngelebizo minaakisi nene dalinge. Imiselezo. 12 Evene' malite meni dalisa ge hulo ne hulo li loti' izi vaa' nani' ne'mino gaza mono' lesisi lamineku' nene zege' zege' ogo loti' izo minevo' minevo' gemeni dameni nene do ti' ozo. Ado' ne'mine iline lo O'moso'mo elese molo-gedavo ogo evene' mukiliti ve'nido' do lamine' ogo Kilisito'nimu' gele ele'vole' oga' naningumu' nene lo soto' aine' ma neive. 13 Ido' O'moso inite' muki' vetesi minaa' amuzo limive'mi velelokisi ido' ngamani naba Podio' Pilato' minidaa gamazi gihile lamine' lo soto' ive Izesu' Kilisito' velelokisi nene ti' lo nolo-giduze: 14 Gaza mono' gamazi lo-giduvoni' nene e'mete gehepeve ozo. Ne'mino gaza a'mine gamazi nene do gopo amanivo evene' nene ningi a'mine gamazimu' nene ningedo' hangedoka lamavo Guvetesi ve Izesu' Kilisito' soto' ilido' nene lihimeka nomine' minelesane lo nolo-giduve. 15 Ido' a'mine Guvetesi ve nene O'moso asi've molani' gamenelo' gehepeve nene do soto' o-deleseive. A'mine O'moso nene laminekukovo' minive dizo minine' gizebo ve hamo' minive guve'inesi naba mukiliti Guve'inesi ve naba minive 16 ei' hamokovo' nene helamaa' ive ado' evene' hamolitesi ngelo avitasi vamolone' o minine' labanali'mi lulou' minive evene' hamolitesi ningamani' mino mo ngeli ningamilizani' O'moso eikumu' nene gilunivo dizo minavo gizebo o-ledeline' amuzo've nene ele'vole' ogo minevo' minevo' ilive. Mo ne'mino minilihoo.

17 Ido' gaza idise mene gamenelo' moni heneni ve nizave nene ga'ine do lo-ngedezo. Angise'inemu' gilavoo dizi minisa a'mine do ngululubize-ledaa' neine' inite' moni henenilo' nene gili mu'musi' igi gili medeli minami asi lanite' gili minilizave lo inite' mata' muki' vauve elo lehize-ledaa' ive O'moso eikumu' neve nene gili mu'musi' igi gili medeli mini 18 gono lamine' di nizavo heneni'ine nene a'mine gono lamine' ne'mo nene lolo' ogavosa a'mine nene vauve ili dii mini engita minine' inite' nene inele panala igi evene' masi nasahili' i-ngidi minilo lo lo-ngedezo. 19 Ne'mine ilizani' nene alinge' gameneu' mine lamine' ilizangumu' hize ele' o-ngedeline' heneni'ine nene di milisa a'mine gameneu' inite' gihile minevo' minevo' ngemeni dameni nene dalizado' minilisave.

Timoteo'ni Gala Do Paulo' Luhuvo Nite' Gize Osu' Lo Gizine' Gamazi

20 Timoteoo, gaza O'moso'mo do-nedeline lo gono gimine' malo' nene gizebo lekeseve ozo. Ido' haza mono' gihile nomine' gamazi evene' malite laa' nani' nesi ido' soza li gele vevesaa' monovolo' noe'metune li mono' gamazite bili laa' nani' gamazi nesi nene gelamo mehenga emaa' ozo. 21 Ne'mine oga' ozo noluvoni' nene evene' ma nene a'mine ne'mine gamazilo' vi gi'mizani' ne'mo mono' gihileloti' nene mo zovo' izi vikeve.

O'moso'mi nasahili' nene lengikisi miniliho.